Rivalet e përbetuara nuk pritet ta kenë lehtë në finalen e Ipko Kupës së Kosovës në konkurrencën e femrave. Prishtina në këtë ndeshje hyn për ta mbrojtur trofeun e fituar një vit më parë, që është një mision shumë i vështirë për bardhekaltrat, derisa Penza do të bëj përpjekje që pas dy vitesh ta kthej trofeun në Pejë.
Pejanet në këtë edicion kanë dominuar në basketbollin femëror kosovar, duke mos e njohur asnjë kundërshtare, madje as edhe prishtinaset, të cilat i kanë mposhtur bindshëm në përballjen në kuadër të kampionatit të Kosovës.
Megjithatë kjo është finale dhe është vetëm një ndeshje, andaj emocione pritet të ketë në të dyja taborret. Basketbolli cilësor nuk do të mungoj, kjo është më se e garantuar, pasi për një gjë të tillë do të përkujdesen nga njëra Arbnore Perquku me kompaninë e saj dhe në anën tjetër Valbona Bytyqi me të sajën.
Prishtina është kampione në fuqi dhe fituese e kupës për edicionin e kaluar, ndërsa në histori të saj e ka fituar 8 herë këtë trofe, derisa në anën tjetër Penza 5 herë është stolisur me Kupën e Kosovës.
Artina Hasani, kapitene e Prishtinës: “Jemi përgatitur maksimalisht për ndeshjen finale. Kemi marr pjesë në mesjavë në një turne në Shkup, ku i kemi zhvilluar dy ndeshje të forta të cilat do të na shërbejnë shumë për finalen e së dielës. Penza është ekip shumë i fortë, ne jemi fitues të Kupës për edicionin e kaluar dhe kjo e bënë finalen shumë interesante. Ne premtojmë se do të angazhohemi maksimalisht për të arritur deri te rezultati pozitiv dhe do të bëjmë çmos që Kupa të mos ndërrojë pronare. Vështirë do të jetë, por ne jemi të gatshme për këtë sfidë shumë të madhe”.
Valbona Bytyqi, kapitene e Penzës: “Pres lojë të mirë në finale. Ne jemi përgatitur dhe të gjitha lojtaret janë në formën më të mirë. Mendoj se pa ndonjë problem do të dominojmë dhe do të fitojmë bindshëm”.
Fituesit e Kupës së Kosovës ndër vite në konkurrencën e femrave:
1997/98 Bashkimi
1999/2000 Universiteti
2000/01 Universiteti
2001/02 Universiteti
2002/03 Universiteti
2003/04 Universiteti
2004/05 Universiteti
2005/06 Universiteti
2006/07 Bashkimi
2007/08 Bashkimi
2008/09 Bashkimi
2009/10 Penza
2010/11 Penza
2011/12 Penza
2012/13 Penza
2013/14 Penza
2014/15 Prishtina