Për pesë ditë me radhë, qyteti i Rahovecit do të jetë festival i basketbollit, ku do të organizohet “Osa Termosistem Final 8”.
Tetë skuadra do të garojnë për trofeun e çmuar dhe priten ndeshje shumë interesante, që nga dita e parë më 11 shkurt deri më 15 shkurt, kur do të jenë finalet në konkurrencën e meshkujve dhe femrave.
Fituese e fundit e Kupës është Sigal Prishtina. Kapiteni legjendar i kësaj skuadre, Edmond Azemi, e dëshiron edhe një trofe të çmuar në karrierën e tij.
“Synimi ynë është të fitojmë trofeun e çmuar. Nuk do ta kemi aspak lehtë, për shkak se, edhe skuadrat tjera janë shumë të forta. Takimin e parë e kemi ndaj Golden Eagle Yllit, që nuk është lehtë. Ne jemi përgatitur për garat e Kupës. Ky trofe ka shumë rëndësi për ne dhe udhëtojmë me synime për ta fituar. Shpresoj se do t’ia arrijmë qëllimit në fund”, është shprehur Azemi për faqen zyrtare të FBK-së.
Sfida e parë për Sigal Prishtinën është ndeshja çerekfinale me Golden Eagle Ylli, që në stinorin pranveror nuk ka pësuar asnjë humbje në Superligë.
Bardhekaltrit edicionin e kaluar fituan titullin, Kupën dhe Superkupën dhe shpresojnë të përsëritin të njëjtin sukses edhe në këtë edicion.
Kjo është hera e dytë radhazi që Final 8 organizohet në Rahovec, ku pritet të ketë ndeshje shumë të bukura dhe atmosferë të jashtëzakonshme.