Sot me ballafaqimin që do të zhvillohet në palestrën “Karagaçi” në Pejë do të nis edhe xhiroja e XXIII-të në Superligën e Kosovës në basketboll, ku do të takohen AFK Borea – Ponte Prizreni me fillim nga ora 16:30.
Ndërkaq të shtunën në kuadër të kësaj xhiroje do të zhvillohet derbi në mes Bashkimit dhe Rahovecit në palestrën “Sezai Surroi” në Prizren duke filluar nga ora 19:00.
Të dielën në program janë dy ndeshje, e para do të luhet me fillim nga ora 17:00 në palestrën “13 Qershori” në Suharekë në mes Golden Eagle Yllit dhe Trepçës, e që po ashtu vlerësohet si kryendeshje e kësaj xhiroje.
Ndeshja tjetër dhe e fundit e kësaj xhiroje do të luhet të dielën në Lipjan, ku ekipi i Lipjanit do të përballet me Z Mobile Prishtinën. Ky takim do të filloj në ora 19:00.
Pas 22 xhirove të zhvilluara në Superligën e Kosovës, Z Mobile Prishtina vazhdon të kryesoj në renditjen tabelare, pas asnjë humbje dhe me 44 pikë të tubuara, e ndjekur nga Golden Eagle Ylli që ka 15 fitore e 7 humbje dhe 37 pikë, kurse Rahoveci zë pozitën e tretë me 14 fitore e 8 humbje dhe me 36 pikë, derisa Ponte Prizreni është i katërti në tabelë me 11 fitore e 11 humbje me 33 pikë, me bilanc të njëjtë me rivalin lokal dhe kampionin në fuqi, Bashkimin. Në pozitën e gjashtë është Trepça me 31 pikë, më pas është Lipjani me 25 dhe AFK Borea me 24 pikë.
