Bordi i Federatës së Basketbollit të Kosovës (FBK) e ka formuar një Grup të Punës, i cili do të fillojë punën në hartimin e Planit Strategjik të FBK-së 2021-2025.
Grupi i Punës do të mbikëqyret nga kryetari i FBK-së, Arben Fetahu, ndërsa do të udhëhiqet nga Sekretarja e Përgjithshme, Elvira Dushku, kurse në Grupin e Punës janë përfshirë të gjitha grupet e interesit të FBK-së, derisa FIBA gjithashtu do të jetë pjesë e këtij procesi shumë të rëndësishëm për FBK-në.
Grupi i Punës do të fillojë punën në muajin maj, kurse i gjithë procesi i planifikimit strategjik do të zgjasë deri në fund të vitit. Plani Strategjik i FBK-së 2021-2025 do të paraqitet në Kuvendin e ardhshëm Zgjedhor të FBK-së që është në program në fillim të vitit 2021.
Arben Fetahu, Kryetar i FBK-së:
“Federata e Basketbollit e Kosovës në vitet e fundit ka përjetuar zhvillim të hovshëm në aspektin e lidershipit, menaxhimit dhe organizimit të saj të brendshëm dhe kjo falë punës dhe përkushtimit maksimal të të gjitha strukturave të saj organizative.
Krahas planeve vjetore me të cilat FBK e ka zhvilluar veprimtarinë e saj brenda një viti, Bordi i FBK-së në fund të vitit 2019 i ka miratuar 5 dokumente shumë të rëndësishme, të cilat do të jenë udhëzues në punën tonë në miratimin e planit strategjik të FBK-së. Këto pesë dokumente të cilat janë miratuar së fundi edhe nga Kuvendi i FBK-së janë:
- Doktrina e nxënies dhe stërvitjes së lojës së basketbollit në Kosovë;
- Karakteristikat themelore të basketbollit modern dhe trendet e zhvillimit të tij si Doktrinë për përcaktimin e përmbajtjes së punës profesionale dhe të unifikuar në basketboll në Kosovë;
- Programi dhe pikat fillestare organizative për themelimin e Qendrës Kombëtare të Basketbollit të FBK-së;
- Themelimi dhe veprimtaritë e Akademive të Basketbollit në Kosovë;
- Fëmijët e Kosovës dhe basketbolli zbavitës me disa elemente të Mini-Basketbollit”.
Andaj në pikën ku ndodhet tani Federata e Basketbollit të Kosovës është i domosdoshëm një plan më aftagjatë i organizatës, pra një Plan Strategjik.
Krijimi i një Plani Strategjik është një pjesë shumë e rëndësishme e çdo organizate, e cila kërkon të zhvillohet dhe të rritet. Ky plan do të ndihmojë në përgatitjen e një vizioni realist për të ardhmen e Federatës. Duke e përgatitur Planin Strategjik ne mund të shtyejmë potencialin tonë për zhvillim dhe për rritje të Federatës”.
