Kerasan Prishtina ka triumfuar të dielën mbrëma kundër Vëllaznimit në ndeshjen e fundit të xhiros së XXVI të Superligës së Kosovës në basketboll.
Takimi i luajtur në Pallatin e Rinisë dhe Sporteve në Prishtinë ka përfunduar me shifrat 74:61 (16:16, 18:16, 15:15, 25:14).
Pra tre cerekët e parë të ndeshjes ishin të barabartë, derisa në të fundit ishte Kerasan Prishtina që tregoi lojë më të mirë dhe kështu në fund arriti të shënoj fitore, e cila ka vlerë të madhe për ekipin nga kryeqyteti.
Kur kanë mbetur edhe dy xhiro deri në përmbyllje të edicionit të rregullt të elitës së basketbollit kosovar, pothuajse tashmë dihet renditja e katër pozitave të para, por edhe të katër ekipeve që qëndrojnë në fundin e tabelës.
Si Vëllaznimi ashtu edhe Kerasan Prishtina në këtë ndeshje kanë luftuar për mbijetesë në Superligë dhe fitorja e basketbollistëve nga kryeqyteti u ka dhënë atyre një arsye më shumë për të besuar se do të luajnë në “play-out”, derisa për skuadrën gjakovare, kjo humbje do të thotë lamtumirë nga elita, ndonëse ende asgjë nuk është definitive, pasi kanë mbetur edhe dy xhiro për t’u luajtur.
Bilanci ndërmjet Vëllaznimit dhe Kerasan Prishtinës tani është 2:2, ndërsa në tabelë kanë pikë të njëjta, por që tani shikohet bilanci në mes tyre, e me fitoren e sotme prej 13 pikëve, në avantazh qëndron ekipi nga Prishtina me 5 pikë dallim nga katër duelet e zhvilluara ndërmjet tyre.
Kerasan Prishtina tani është në pozitën e shtatë, kurse Vëllaznimi në të tetën.
Më të dalluarit te Kerasan Prishtina në triumfin ndaj Vëllaznimit ishin Alban Latifaj me 21 pikë, 9 kërcime e 8 asistime, Gent Shala me 15 pikë e 11 kërcime dhe Rinor Ahmeti me 13 pikë, 6 kërcime e 4 asistime.
Në anën tjetër te ekipi gjakovar më efikasit ishin Beqë Kovaqi me 25 pikë e 8 kërcime, Musab Malaj me 11 pikë, 6 kërcime e 3 asistime dhe Atik Koshi me 10 pikë, 6 kërcime e 3 asistime.
