Pas zhvillimit të Kampit për grupmoshat U-12 dhe U-14 (djem dhe vajza) nëpër qytete të ndryshme të Kosovës prej 4 deri më 8 prill (e hënë-e premte), Federata e Basketbollit e Kosovës (FBK) më 9 dhe 10 prill (e shtunë – e diel) do t’i grumbullojë rreth 60 fëmijë të grupmoshave të lartëpërmendura në Prishtinë.
Kampi në Prishtinë do të udhëhiqet nga koordinatori i gjeneratave të reja në FBK, trajneri amerikan, Chris Dial, së bashku me trajnerët vendor që kanë punuar gjatë gjithë javës me fëmijët në qytetet e tyre.
Të shtunën dhe të dielën do të zhvillohen nga 2 stërvitje në ditë për secilën grupmoshë, pra për U-12 dhe U-14. Kampi do të mbahet në palestrën e sportit të Kolegjit ISP në Marigona Rezidence.
Kampi është zhvilluar për pesë ditë në Prishtinë, Pejë, Prizren, Mitrovicë, Ferizaj, Vushtrri, Gjilan, Gjakovë, Istog dhe Shtërpce, ndërsa për qëllim ka masovizimin e basketbollit ndër djem dhe vajza të kësaj grupmoshe.
Fëmijët janë duke stërvitur nga dy herë në ditë, ndërsa gjatë 1 dite në Kamp janë të përfshirë rreth 300 fëmijë nga të gjitha qytetet e Kosovës.
Kampi është organizuar nga Federata e Basketbollit e Kosovës (FBK) në mbështetje të programit të FIBA-s, “Youth Development Camp”.
Më poshtë ne do ta paraqesim orarin e stërvitjeve për fundjavë, kurse listën me emrat e fëmijëve do ta publikojmë deri në orët e mbrëmjes.
E shtunë
10:00 – 11:30 Stërvitja e U-12
11:30 – 13:00 Stërvitja e U-14
13:30 – 15:00 Stërvitja e U-12
15:00 – 16:30 Stërvitja e U-14
E diel
10:00 – 11:30 Stërvitja e U-12
11:30 – 13:00 Stërvitja e U-14
13:30 – 15:00 Stërvitja e U-12
15:00 – 16:30 Stërvitja e U-14
Stërvijtjet mbahen në palestrën e sportit në Kolegjin ISP në Marigona Rezidence.
