Kampi për grupmoshat U-12 dhe U-14 në të dyja konkurrencat (meshkuj/femra), i cili ka startuar të hënën në të gjitha qytetet e Kosovës është duke u zhvilluar me mjaft sukses. Fëmijët janë duke stërvitur nga dy herë në ditë, ndërsa gjatë 1 dite në Kamp janë të përfshirë rreth 300 fëmijë nga të gjitha qytetet e Kosovës.
Kampi është organizuar nga Federata e Basketbollit e Kosovës (FBK) në mbështetje të programit të FIBA-s, “Youth Development Camp”.
Kampi është duke u zhvilluar në Prishtinë, Pejë, Prizren, Mitrovicë, Ferizaj, Vushtrri, Gjilan, Gjakovë, Istog dhe Shtërpce, ndërsa për qëllim ka masovizimin e basketbollit ndër djem dhe vajza të kësaj grupmoshe.
Gjatë këtyre 5 ditëve fëmijët do të stërvitin nga dy herë në ditë me trajnerët që punojnë me këto grupmosha nëpër qytetet e lartëpërmendura, ndërsa të premten do të përzgjidhen fëmijët nga të gjitha këto qytete, për të vazhduar më pas me dy ditët e fundit të Kampit që do të zhvillohen në Prishtinë.
Të shtunën dhe të dielën stërvitjet do të organizohen në palestrën e sportit të Kolegjit ISP në “Marigona Residence” në Prishtinë. Gjatë këtyre dy ditëve me fëmijët e përzgjedhur do të punoj koordinatori i FBK-së për gjenerata të reja, trajneri amerikan Chris Dial. Me këtë rast Dial së bashku me FBK-në do të fillojnë në ndërtimin e Përfaqësueseve U-14 në të dyja konkurrencat.
