Pas fitores së Estonisë të mërkurën në Tallinn ndaj Maqedonisë në kuadër të Grupit C të parakualifikimeve evropiane për Kupën e Botës “Kina 2019”, tani gjasat e Kosovës për kualifikim tutje në këtë garë janë rritur dukshëm.
Përfaqësuesja jonë e ka shansin që të shtunën në përballje me Estoninë në Prishtinë të regjistroj fitore, me c’ rast edhe do të kualifikohej tutje.
Tani mbetet që të shtunën Përfaqësuesja jonë me lojën e saj dhe me përkrahjen e tifozëve të flaktë, ashtu si në ndeshjen e parë kundër Maqedonisë në Prishtinë të tregoj forcën e saj të vërtetë dhe kështu të kualifikohet tutje.
Ndërkohë Përfaqësuesja e Kosovës ka vazhduar me përgatitjet intensive për takimin e së shtunës dhe basketbollistët të udhëhequr nga kapiteni Dardan Berisha janë më të motivuar se kurrë që në fundjavë me përkrahjen e lojtarit të 6-të të arrijnë deri te fitorja, e cila do ta kualifikoj Kosovën për herë të parë në histori në një garë të tillë.
Ndeshja të shtunën do të zhvillohet në Pallatin e Rinisë dhe Sporteve në Prishtinë me fillim nga ora 20:15, ndërsa do të transmetohet drejtpërdrejtë në Radiotelevizionin e Kosovës.
Duhet theksuar se Estonia pas triumfit ndaj Maqedonisë është kualifikuar tutje, derisa tani Kosovës i mbetet të shënoj fitore ndaj estonëve të shtunën, në të kundërtën janë maqedonasit ata që do të vazhdojnë tutje në këtë garë.
