Federata e Basketbollit e Kosovës (FBK) njofton se sot ka ndërruar jetë profesor Dervish Agaj. I ndjeri ka qenë ndihmëstrajner i Bashkimit të Prizrenit në edicionet 1985/86 dh 1986/87 në kohën kur kjo skuadër ka luajtur në Ligën e Parë B Federative të ish-Jugosllavisë dhe në krye të saj ka qenë profesor Masar Nixha.
Pasluftës Agaj sërish e ka drejtuar Bashkimin, derisa një periudhë ka qenë edhe në krye të Trepçës nga Mitrovica. Ai ka qenë gjithashtu edhe kryetar i Shoqatës së Trajnerëve të Federatës së Basketbollit të Kosovës (SHTFBK) si dhe pjesë e Këshillit Profesional të FBK-së.
Kjo humbje është shumë e madhe për basketbollin kosovar në përgjithësi duke marr parasysh kontributin e madh që profesori e ka dhënë për zhvillimin e këtij sporti në periudha të ndryshme dhe me këtë rast FBK u shpreh ngushëllime familjarëve dhe miqve të Agajt.
Mbledhja komemorative për të ndjerin do të organizohet të hënën në Prizren duke filluar nga ora 11:00, kurse varrimi do të bëhet me fillim nga ora 13:00.
