Të mërkurën dhe të enjten do të zhvillohen ndeshjet e xhiros së XIII në Superligën e Kosovës në basketboll.
Të mërkurën me fillim nga ora 19:00 në palestrën e sporteve “Sezai Surroi” në Prizren do të zhvillohet ndeshja më interesante e kësaj xhiroje, ku Ponte Prizreni e pret Trepçën.
Trepça zë vendin e katërt në renditjen tabelare, ku në 12 ndeshje ka regjistruar bilanc prej 6 fitore e 6 humbje, derisa Ponte Prizreni zë pozitën e gjashtë, me një ndeshje më pak të zhvilluar dhe me bilanc prej 4 fitore e 7 humbje.
Ndërkaq të mërkurën do të luhet edhe një tjetër ndeshje, ajo në Suharekë ndërmjet Golden Eagle Yllit dhe Lipjanit duke filluar nga ora 19:00, kurse të enjten në program është dueli në mes Bashkimit dhe Boreas, që do të luhet me fillim nga ora 19:00 në Prizren.
Duhet theksuar se ndeshja në mes Rahovecit dhe Z Mobile Prishtinës do të luhet më 17 dhjetor në ora 19:00 në Prishtinë.
Të gjitha ndeshjet mund ti ndiqni në platformën ArtMotion.
