Sigal Prishtina e ka siguruar finalen e play-off-it pasi të shtunën mbrëma e ka mposhtur Trepçën edhe në ndeshjen e tretë gjysmëfinale.
Takimi i luajtur në palestrën "Minatori" në Mitrovicë ka përfunduar me rezultat 104:82 (21:18, 21:22, 28:24, 34:18).
Koshashënuesit më të mirë te Sigal Prishtina ishin Mike Moser me 25 pikë e 8 kërcime, Fisnik Rugoa me 23 pikë e 5 kërcime, Drilon Hajrizi me 18 pikë, 5 kërcime e 6 asistime, Jabarie Hinds me 17 pikë dhe Granit Rugova me 15 pikë e 5 kërcime.
Në anën tjetër te Trepça më efikasit ishin Samir Zekiqi me 31 pikë, Scott Montrael me 23 pikë dhe Besnik Azemi me 14 pikë.
Bardhekaltrit në finalen e madhe do të përballen me Bashkimin nga Prizreni, skuadër kjo që e ka eliminuar në gjysmëfinale Pejën pas serisë 3:0.
Përparësinë e terrenit vendas e kanë kryeqytetasit, ndërsa ekipi që shënon tri fitore do të shpallet kampion i Kosovës për edicionin 2016/17.
Kampione në fuqi është Sigal Prishtina, e cila njëherësh është skuadra më e trofeshme në vendin tonë që nga paslufta me 11 tituj të kampionit. Ndërkaq Bashkimi për herë të dytë që nga viti 1999 ka arritur të sigurojë finalen, por asnjëherë nuk ka arritur të stoliset me titull.
Duhet theksuar se për Bashkimin kjo është finalja e parë pas 8 vjetësh, më saktësisht që nga edicioni 2008/09.
