Sigal Prishtina e ka shënuar edhe fitoren e tretë ndaj Bashkimit në Superligën e Kosovës. Bardhekaltrit i shkaktuan disfatë portokallinjve të premten mbrëma në ndeshjen e zhvilluar në kryeqytet në kuadër të xhiros së XXVII. Takimi ka përfunduar me rezultat 94:67 (28:20, 22:21, 24:15, 20:11).
Dy cerekët e parë të ndeshjes ishin më të baraspeshuar, ndërsa në dy të fundit ishin nikoqirët ata të cilët dominuan në parket dhe kështu në fund regjistruan fitore me 27 pikë dallim, që është më e thella e prishtinasve karshi prizrenasve në këtë edicion.
Më efikasit në radhët e vendasve ishin Jason Washburn me 29 pikë e 13 kërcime, Mohamed Abukar me 17 pikë dhe Dardan Berisha me 13 pikë, 5 kërcime e 4 asistime. Ndërkaq të mysafirët më së shumti pikë ka shënuar Theron Busey, gjithsej 12 sosh.
Këto dy skuadra do të takohen edhe në gjysmëfinale të “play-off”-it, pasi Sigal Prishtina është e dyta në renditjen tabelare, kurse Bashkimi zë vendin e tretë. Cifti tjetër gjysmëfinal është Peja, si lidere dhe Trepca, nga pozita e katërt.
Duhet theksuar se prishtinasit i kanë mposhtur edhe një herë në këtë edicion prizrenasit dhe kjo ka ndodhur në kuadër të gjysmëfinales së Ipko Kupës së Kosovës, trofe ky që në fund i takoi Sigal Prishtinës pasi në një finale mjaft dramatike e ka mundur Pejën.
Prishtina e ka regjistruar një humbje nga Bashkimi në këtë edicion, dhe kjo ka ndodhur në stinorin vjeshtor, pra në fund të vitit 2015.
