Rrugëtimi i TOP 4-shit të Sigal Uniqa Ligës Ballkanike (BIBL) do të nis këtë mesjavë, më saktësisht të martën me përballjen që do të zhvillohet në Gjevgjeli të Maqedonisë, ku Kozuv-i e pret Mornar-in nga Tivari i Malit të Zi, ndërsa një ditë më vonë, të mërkurën, skuadra kampione në fuqi e BIBL-it, Sigal Prishtina është mysafire e Beroe-s në Stara Zagora të Bullgarisë. Ndeshjet e kthimit do të luhen pas një jave, në Tivar, respektivisht në Prishtinë.
Bardhekaltrit dy herë e kanë mposhtur klubin bullgar gjatë edicionit të rregullt në BIBL, por sipas basketbollistit më të mirë të Sigal Prishtinës, Dardan Berishës kjo nuk do të thotë asgjë për arsye se gjysmëfinalet janë ndeshje krejt tjera dhe se si të tilla edhe duhet të trajtohen.
Dardan Berisha, basketbollist i Sigal Prishtinës: “Beroe në disa ndeshjet e fundit në Ligën Ballkanike ka treguar një lojë më të pjekur dhe këtë më së miri e dëshmon fakti se është renditur në gjysmëfinale. Po ashtu në Superligën e Bullgarisë së fundi i ka shënuar disa fitore shumë të rëndësishme, duke e mposhtur edhe liderin e tabelës, Lucoil Academic-un, kurse aktualisht është në pozitën e tretë me pikë të barabarta me Balkan-in që është në të dytin. Pra këto janë fakte që ne nuk guxojmë aspak t’i anashkalojmë. Mendoj se është shumë e rëndësishme se si do të paraqitemi në ndeshjen e parë. Kemi përvojë nga gjysmëfinalet e edicionit të kaluar në këtë ligë dhe për këtë arsye mendoj se duhet të hyjmë të fokusuar dhe të angazhohemi maksimalisht nga minuta e parë e deri tek e fundit për të nxjerr rezultat pozitiv. Nuk do të jetë aspak lehtë, edhe për faktin se ndeshjen e parë do ta luajmë në Stara Zagora, që për ne do të jetë edhe një udhëtim i gjatë. Sidoqoftë ne do të bëjmë më të mirën në parket në mënyrë që të dalim fitues në ndeshjen e parë dhe më pas të kthehemi në Prishtinë dhe të përgatitemi për takimin e dytë para shikuesve tanë, ku presim përkrahje maksimale si gjithnjë në rrugëtimin tonë për në finale, në drejtim të mbrojtjes së titullit në BIBL”.
Duhet theksuar se Sigal Prishtina i ka regjistruar 6 fitore rresht në fazën e dytë të BIBL-it, duke mos e regjistruar asnjë humbje, derisa në fazën e parë bardhekaltrit janë mposhtur tri herë.
Ndeshjet e para gjysmëfinale në BIBL:
E martë
Kozuv - Mornar 19:00
E mërkurë
Beroe - Sigal Prishtina 18:30
