Përballja ndërmjet Pejës dhe Sigal Prishtinës, e luajtur të shtunën mbrëma në palestrën "Karagaci" në prani të rreth 1500 shikuesve ka përfunduar me fitore të mysafirëve.
Kjo ndeshje i ka takuar xhiros së XVI në Superligën e Kosovës në basketboll, ndërsa ka përfunduar me rezultat 79:67 (16:14, 27:25, 16:13, 20:15) në favor të bardhekaltërve
Prej fillimit të ndeshjes e deri në fund është zhvilluar një duel mjaft interesant, ku të dyja palët kanë luftuar për cdo pikë, por që në secilin cerek të ndeshjes ishin mysafirët ata që ishin për një nuancë më të mirë, andaj edhe në fund e përmbyllën gjithë takimin në dobi të tyre me 12 pikë dallim.
Gjatë këtij edicioni Peja dhe Sigal Prishtina janë ballafaquar tri herë në kuadër të elitës së basketbollit kosovar dhe tani bilanci është 2:1 për kryeqytetasit.
Më të dalluarit te Sigal Prishtina në derbin e sotëm ishin Jabarie Hinds me 19 pikë, 6 kërcime e 7 asistime, Drilon Hajrizi me 16 pikë, 5 kërcime e 2 asistime dhe Nenad Deliq me 9 pikë e 5 kërcime.
Te Peja më efikasit ishin Alban Veseli me 19 pikë, 6 kërcime e 3 asistime dhe Jamie Obrien Billie me 16 pikë e 12 kërcime.
Ndërkaq në kuadër të xhiros së XVI të Superligës të shtunën janë luajtur edhe dy ndeshje të tjera, ku Vllaznimi është mposhtur nga Rahoveci me shifrat 97:73 (22:19, 37:14, 20:16, 18:24).
Koshashënuesitë më të mirë te Rahoveci ishin Tylor Deihl me 15 pikë, Mustafë Merovci me 14, Altin Morina me 14 dhe Muhamed Hasani me 12 pikë. Te Vllaznimi, Beq Kovaqi me 22 pikë dhe Atik Koshi me 13 ishin më efikasit.
Fitore ka realizuar edhe Bashkimi, skuadër kjo që e ka mposhtur Kerasan Prishtinën me rezultat 96:84 (17:14, 21:26, 25:22, 33:22).
Më të dalluarit të prizrenasit ishin Mikaeile Tmushiq me 30 pikë, Imer Tahiri me 21 pikë, Qëndrim Biraj me 20 dhe Edmond Kryeziu me 13 pikë.
Në anën tjetër te Kerasan Prishtinë më efikasit ishin Genc Gashi me 36 pikë, Alban Latifaj me 13 dhe Ermir Gashi me 12 pikë.
Në program të xhiros së XVI, të dielën është vetëm një ndeshje, ajo që do të zhvillohet në Therandë ndërmjet Golden Eagle Yllit dhe Trepcës. Ky takim do të luhet me fillim nga ora 18:00.
