Me përballjen në mes Bashkimit dhe Pejës që do të zhvillohet sonte me fillim nga ora 19:30 në palestrën "Sezai Surroi" në Prizren do të nis "play-off"-i në Superligën e Kosovës në basketboll. Këto dy ekipe janë takuar disa herë gjatë edicionit të rregullt, ndërsa së fundi prizrenasit kanë qenë më të suksesshëm se pejanët të cilëve edhe ua "vodhën" krejt në fund pozitën e dytë në renditjen tabelare.
Ndërkaq të dielën në program është ndeshja tjetër gjysmëfinale, ku do të ballafaqohen Sigal Prishtina dhe Trepca, takim ky që do të luhet me fillim nga ora 18:00 në Pallatin e Rinisë dhe Sporteve në kryeqytet.
Bardhekaltrit vlerësohen favoritë karshi mitrovicasve, pasi që në të gjitha duelet e luajtura ndërmjet vete gjatë pjesës së rregullt kanë qenë më të suksesshëm, përvec një ndeshje që i ka takuar Trepcës.
Ekipet që shënojnë nga tri fitore do të radhiten në finalen e madhe.
Kampione në fuqi është skuadra e Sigal Prishtinës.
