“Stobi Flips” është sponsor gjeneral i FIBA U20 Kampionatit Evropian, Divizioni B-Femrat që do të mbahet në Prishtinë prej 3 deri më 11 Gusht 2019.
Federata e Basketbollit të Kosovës (FBK) ka arritur marrëveshje me kompaninë “Vitaminka” në mënyrë që brendi “Stobi Flips” të jetë sponsor gjeneral i FIBA U20 i Kampionatit Evropian, Divizioni B-Femrat.
FBK dhe kompania “Vitaminka” ka dy vite që bashkëpunojnë ngushtë, derisa “Stobi Flips” është brendi i cili vazhdimisht është në përkrahje të basketbollistëve dhe basketbollisteve të reja të Kosovës.
Në vitin e kaluar “Stobi Flips” ka qenë sponsor gjeneral i FIBA U18 Kampionatit Evropian, Divizioni C që është organizuar në Prishtinë prej 22 deri më 29 korrik, kur edhe Kosova u pati shpallur kampione për të kaluar më pas një Divizion më lartë, në atë B. Pas këtij bashkëpunimi FBK dhe “Stobi Flips” patën arritur marrëveshje që kjo e fundit të bëhet sponsor i të gjitha ligave të kategorive të reja.
FIBA U20 Kampionati Evropian, Divizioni B-Femrat do të mbahet në Prishtinë prej 3 deri më 11 Gusht 2019, ndërsa do të marrin pjesë 12 shtete: Kosova, Izraeli, Finlanda, Britania e Madhe, Kroacia, Turqia, Greqia, Ukraina, Bullgaria, Rumania, Irlanda dhe Islanda.
Duhet theksuar se Federata e Basketbollit të Kosovës është në negociata edhe me disa sponsorë të tjerë dhe shumë shpejtë pritet të publikojë emrat e tyre.
Ndërkaq Ministria për Kulturë, Rini e Sport e Kosovës është mbështetësi kryesor i këtij aktiviteti, derisa edhe Komuna e Prishtinës e ka përkrahur këtë event të një rëndësie të veçantë.
