Federata e Basketbollit të Kosovës sot ka organizuar konferencë për media një ditë para ndeshjes kualifikuese për Kupën e Botës “Kina 2019” ndërmjet Përfaqësueses së Kosovës dhe asaj të Hungarisë.
Të pranishëm në konferencë ishin, kapiteni Dardan Berisha, basketbollisti Erjon Kastrati, përzgjedhësi i Kosovës, Brad Greenberg dhe kryetari i FBK-së, Arben Fetahu.
Hyrja për ndeshje do të jetë falas, ndërsa FBK fton publikun që të jenë të pranishëm në numër sa më të madh në përkrahje të djelmoshave tanë, të cilët të enjten dhe dielën do të dalin në fushë dhe do të luajnë për Gazin.
Ndeshja Kosovë – Hungari do të zhvillohet të enjten me fillim nga ora 20:30 në Pallatin e Rinisë dhe Sporteve në Prishtinë, ndërsa në të njëjtin orar do të luhet edhe të dielën takimi, Kosovë-Poloni.
Dardan Berisha, kapiten i Përfaqësueses së Kosovës:
“Jemi duke u përballur me një situatë shumë të vështirë emocionale, po mundohemi ta përballojmë, por nuk është aspak lehtë.
Ne vetëm sot kemi dal në fushë dhe e kemi zhvilluar stërvitjen e parë, s’ka qenë lehtë, sepse të gjithë ne kemi pasur emocione për faktin se dy javë kemi stërvitur së bashku me Gazin dhe lojtarët tjerë që janë të lënduar.
Në aspektin fizik dhe mental nuk jemi të përgatitur, por po bëjmë përpjekje që deri të enjten në mbrëmje, kur edhe do të luhet ndeshja të japim maksimumin për të hyrë në fushë dhe për të luajtur mirë për Gazin dhe për shtetin tone.
Shfrytëzoj rastin t’i bëjë thirrje të gjithë adhuruesve të sportit të jenë në numër sa më të madh në palestër, sepse vërtetë kemin nevojë për mbështetjen e të gjithëve”.
Erjon Kastrati, basketbollist i Përfaqësueses së Kosovës:
“Krejt çfarë mundemi të bëjmë është të gjejmë forcën të hyjmë në ndeshje dhe të luajmë sa më mirë dhe këtë ta bëjmë për Gazin.
Jemi të vetëdijshëm se gjendja jonë fizike dhe mentale nuk është e mirë, por do të mundohemi maksimalisht të gjejmë forcën e duhur për të luajtur. Të gjithë e dimë se në këtë ndeshje rezultati nuk është në plan të parë, andaj ne do të bëjmë përpjekje që të luajmë në kujtim për Gazin”.
Brad Greenberg, përzgjedhës i Kosovës:
“Mendimet tona janë me familjen e Gazit dhe të tjerë që janë lënduar në aksident. Pas aksidentit të gjithë kemi qenë në shok dhe nuk kemi menduar për basketboll.
Ne sot kemi stërvitur për herë të parë dhe as paraqitja në parket nuk ka qenë e lehtë për të gjithë ne e veçanarisht për lojtarët.
Të enjten kundër Hungarisë dhe të dielën kundër Polonisë do të mundohemi të paraqitemi sa më mirë. Është e rëndësishme ta theksoj se grupi po mundohet ta përballoj situatën duke qëndruar i bashkuar dhe lirisht mund të them se karakteri i grupit është vërtetë i lartë.
Do të bëjmë përpjekje të hyjmë në fushë dhe të luajmë me shpirt, ashtu siç edhe Gazi e ka dashur jetën me plot shpirt.
Këto janë momente të vështira për të gjithë ne, por vetëm kështu të bashkuar mund t’ia dalim”.
Arben Fetahu, kryetar i FBK-së:
“Rast të tillë si ky çfarë na ka ndodhur ne, nuk ka pasur në të kaluarën as në radhët tona, e as në ato të FIBA-s, dhe pavarësisht faktit se ne kemi kërkuar që të mos luajmë, sepse në aspektin emocional nuk jemi në gjendje ta bëjmë këtë, FIBA na ka informuar se ndeshjet duhet të zhvillohen.
Tani ne duhet t’i mbledhim forcat dhe t’i motivojmë djemtë tanë që të hyjnë në ndeshje dhe të gjejnë forcën për të luajtur.
Në aspektin e basketbollit, ekipi nuk është në gjendje të mirë, pasi kemi të lënduar nga aksidenti, pastaj të lënduar në stërvitje dhe kjo na i ka vështirësuar edhe më shumë situatën.
Sidoqoftë të enjten dhe të dielën në fushë do të paraqiten 11 lojtarë, ndërsa vendi i 12-të do të jetë për Gazmend Sinanin.
Në të dyja këto ndeshjet mendimet tona do të jenë me familjen e Gazit dhe të atyre që janë lënduar nga aksidenti.
Në çdo ndeshje shikuesit janë shumë të rëndësishëm, këtë e dimë të gjithë, por kësaj radhe është diçka e veçantë, andaj ftojmë opinionin që në numër sa më të madh të jenë në palestër, për të përkrahur djelmoshat tanë, sepse me të vërtetë këta janë heronjtë e vërtetë të kësaj ngjarje”.
