Bordi i FBK-së në mbledhjen e mbajtur më 14.04.2015, pas diskutimit për pikat e rendit të ditës dhe çështje të tjera aktuale në basketbollin e Kosovës miratoi këto vendime:
1. Reprezentacioni i Kosovës U-16 në kuadër të përgatitjeve për Kampionatin Evropian Divizioni C, gjatë muajit qershor do të marrë pjesë në Kampin në San Antonio të Shteteve të Bashkuara të Amerikës.
2. Bordi miratoi plan-programin vjetor për zhvillimin e kategorive të reja, të paraqitur nga organizata "The Basketball Embassy" dhe që përfaqësuesi i saj Chris Dial të jetë koordinatori për kategori të reja i FBK-së.
3. U vlerësua paraqitja e suksesshme e tre gjyqtarëve të rinj – Elion Obërtinca, Dardan Maxhuni dhe Kushtrim Shala, në "Scania Camp" dhe u përkrah nominimi i tre gjyqtarëve të tjerë të rinj - Ngadhnjim Shabani, Blendi Fejza dhe Endrit Basha në Kampin "Can Do Basketball" që zhvillohet në Sofje.
4. Faton Kurshumlija nominohet si kandidat i FBK-së për titullin e Instruktorit të FIBA-s për Kosovë.
5. Chris Dial emërohet selektor i reprezentacionit të Kosovës të grup moshës U-16. Z. Dial do të emërojë shtabin e tij teknik ndërkohë do të udhëheqë edhe me punën me këtë reprezentacion krahas punës së tij si koordinator i kategorive të reja.
6. Në bazë të propozimit të Këshillit Profesional, Ilir Selmani emërohet selektor i reprezentacionit të Kosovës, të grupmoshave U-20. Z. Selmani duhet të kompletojë shtabin e tij teknik dhe të paraqesë programin e punës në afat sa më të shkurtër.
7. Bordi i dha mbështetje iniciativës që reprezentacioni U-20 të zhvillojë ndeshje miqësore me ekipin e grupmoshave të reja të KB Rilski Sportist në Bullgari si para ndeshje e finales së Ligës Ballkanike ndërmjet Rilskit dhe Sigal Prishtinës.
8. Valton Bilalli emërohet ushtrues detyre i Drejtorit të Reprezentacioneve të kategorive të reja. Z. Bilalli do të udhëheqë punët në përgatitjen e reprezentacioneve të reja për pjesëmarrje në kampionatet evropiane.
9. U miratua në parim raporti financiar për tre mujorin e parë të vitit 2015.
10. Anëtarët e Bordit u informuan për mbajtjen e mbledhjes së Bordit të BIBL në Prishtinë më 28 maj 2015, ku FBK do të jetë në rol mbështetës organizativ.
11. Anëtarët e Bordit vendosën që Sekretari i Përgjithshëm Leart Hoxha të marrë pjesë në Takimin e Sekretarëve të Përgjithshëm të FIBA Evropës, në Mynih më 20 prill dhe që Kryetari Erolld Belegu dhe anëtari i Bordit Arben Fetahu të marrin pjesë në Asamblenë e Përgjithshme të FIBA Evropës më 16 e 17 maj në Maltë.
12. Bordi mori vendim, që me qëllim të promovimit sa më të mirë të aktiviteteve të FBK-së, të angazhojë një zyrtar për shtyp, që do të lidhë marrëdhënie pune me FBK-në.
13. Bordi vendosi që në postin e zyrtarit për shtyp të emërojë Elvira Dushkun.
14. Bordi autorizoi Kryetarin Erolld Belegu që të negociojë në emër të FBK-së me kompani të mediave dhe televizive për të drejtat televizive të garave të FBK-së dhe të reprezentacioneve të Kosovës.
