Bordi i Federatës së Basketbollit të Kosovës, në mbledhjen e vet të mbajtur më 21.09.2014 diskutoi për zhvillimet e fundit në basketbollin e Kosovës.
Bordi ka shqyrtuar kërkesën e KB Besa që ti jepet e drejta për garim për sezonin 2014/15 dhe ka konstatuar se KB Besa ka paguar me vonesë prej tetë ditësh borxhin nga sezoni i kaluar dhe depozitin për garim në ETC Superligë në sezonin 2014/15, që kanë qenë obligimet kryesore financiare për licencim.
Duke qenë të përkushtuar për punë në interes të basketbollit të Kosovës, bordi i FBK-së njëkohësisht është i angazhuar fuqishëm për kthim të rregullshmërisë të funksionimit të klubeve dhe anëtarëve të FBK-së.
Duke u nisur nga parimet e lartëcekura, rezultatet e KB Besës dhe KB Dritës të treguar në fushë sezonin e kaluar dhe interesin që sa më shumën klube të garojnë në nivel të lartë, bordi i FBK-së ka marrë vendim që këtyre dy klubeve tu jepet afat shtesë për përmbushje të kritereve për licencim.
Bordi i FBK-së i jep KB Dritës dhe KB Besës afat deri të martën, më 23.09.2014 në ora 16:00 të përmbushin të gjitha obligimet tjera financiare dhe teknike për licencim për sezonin 2014/15, duke përfshirë paraqitjen e ekipeve të gjeneratave të reja me përbërje të plota, pagesën për licencim të ekipeve të gjeneratave të reja dhe kriteret tjera që derivojnë nga Rregullorja për Sistematizim dhe Licencim të Klubeve dhe Shkollave të Basketbollit.
Bordi përshëndetë përmirësimin e dukshëm të organizimit të testit fizik dhe teorik për gjyqtarë dhe vëzhgues dhe përshëndetë rezultatet e arritura, sidomos nga ana e vëzhguesve.
Bordi kërkon raport të detajuar nga koordinatori teknik dhe bordi i SHGJFBK-së për testimin e djeshëm dhe rekomandimet e tyre për datën e ritestimit për kandidatët që nuk kanë kaluar testimin dhe për miratimin e listës së plotë të gjyqtarëve dhe vëzhguesve për sezonin 2014/15.
