Golden Eagle Ylli e ka mundur Rahovecin me rezultat 88:84 (16:23, 25:16, 21:21, 26:24), në derbin e javës së 24-të në Superligën e Kosovës në basketboll.
Në palestrën e stërmbushur me tifozë dhe në një atmosferë të jashtëzakonshme, ndeshja ka qenë shumë interesante dhe me shumë kthesa.
Mysafirët e nisën ndeshjen më mirë dhe e fitojnë çerekun e parë 16:23. Por, në periodën e dytë, ndodhi e kundërta ku vendasit të udhëhequr nga Samir Zekiqi e fitojnë këtë pjesë 25:16, për të shkuar në pushim me rezultat 41:39. Perioda e tretë ishte tërësisht e barabartë, ku herë njëra skuadër kalonte në epërsi, e herë tjetra, derisa kjo pjesë përfundoi 21:21, kurse rezultati në semafor pas 30 minutash tregonte shifrat 62:60 për Yllin. Në 10 minutat e fundit të ndeshjes, skuadra therandase kishte epërsi deri në dhjetë pikë, 77:67, por Rahoveci luftoi deri në fund, duke bërë ndeshjen shumë interesante, megjithatë, Ylli ruajti epërsinë dhe triumfoi në fund 88:84.
Te Golden Eagle Ylli u dalluan Samir Zekiqi me 24 pikë e tetë kërcime, Devonte Browen me 16 pikë, shtatë kërcime dhe shtatë asistime dhe Terrel Eveeret me 15 pikë, katër kërcime e gjashtë asistime, derisa te Rahoveci më të mirët në fushë ishin Darell Davis me 23 pikë e shtatë asistime dhe Altin Morina me 18 pikë, pesë asistime e pesë kërcime.
Golden Eagle Ylli tani ka 15 fitore dhe gjashtë humbje, kurse Rahoveci 16 fitore dhe gjashtë humbje.
