Kosova A (femrat) për herë të parë vitin e ardhshëm do të garojë në arenën ndërkombëtare. Formimi i Përfaqësueses A te femrat dhe pjesëmarrja në garat zyrtare është përkrahur nga komuniteti i basketbollit në Kosovë.
Shumë basketbolliste e kanë ëndërruar këtë ditë, por që nuk kanë mundur për shkak të mos pranimit në arenën ndërkombëtare. Por, këtë ëndërr, do ta jetësojnë gjeneratat e reja.
Ish-basketbollistja e Universitetit të Prishtinës, Teuta Abdullahu është shprehur se çdo debutim ka peshën dhe rëndësinë e vet. “Çdo debutim në garat ndërkombëtare ka peshën, rëndësinë dhe përgjegjësinë e vet, e aq më tepër kur është fjala në nivel të Përfaqësueses.
Mundësia për garim në këtë nivel është lajm i mirë dhe premtues për basketbollin femëror, mirëpo mendoj që është edhe mjaft ambicioz, duke konsideruar nivelin e basketbollit femëror në vendin tonë. Jemi dëshmitarë të asaj se sa shumë punë dhe përvojë në garat ndërkombëtare i nevojitet një ekipi të ketë prezantim të suksesshëm”, është shprehur basketbollistja e gjeneratës së artë për faqen zyrtare të FBK-së, duke shtuar:
“Një kohë të gjatë Përfaqësuesja A te femrat ka qenë në “gjumë”, prandaj kjo më jep një dozë skepticizmi për garat e vitit të ardhshëm, ku pritet të marrë pjesë.
Në anën tjetër, ky lajm i jep motiv kategorive të reja të cilat janë duke garuar në kategoritë përkatëse. Atyre u është hapur mundësia e garimit ndërkombëtar edhe pasi të arrijnë moshën seniore. Vajzave të Përfaqësueses, ekipit teknik dhe FBK-së, ju uroj shumë suksese në këtë rrugëtim me shumë sfida dhe shumë punë para që i presin”, deklaroi Teuta Abdullahu, e cila me sukses ka luajtur për Universitetin e Prishtinës, duke garuar edhe në Ligën Trocal.
Kosova A (femrat) pritet të marrë pjesë në FIBA Kampionatin Evropian të Shteteve të Vogla, që do të organizohet në vitin e ardhshëm në Nicosia të Qipros prej 15 deri më 20 Qershor.
Në FIBA Kampionatin Evropian për Shtetet e Vogla-Femrat në vitin 2020 janë paraqitur për të garuar: Andorra, Qipro, Gjibraltari, Irlanda, Luksemburgu, Malta dhe Norvegjia, por që u anulua për shkak të pandemisë Covid-19. Regjistrimi i shteteve për pjesëmarrje në FIBA Kampionate Evropiane në FIBA Europe do të bëhet si zakonisht, pra ndërmjet muajve Shtator/Tetor 2020.
FIBA Evropa ka kërkuar nga të gjitha Federatat Nacionale që të regjistrojnë ekipet e tyre për vitin 2021, pasi regjistrimet e paraqitura për vitin 2020 nuk do të merren parasysh.