Federata e Basketbollit të Kosovës (FBK) e ka përmbyllur vitin 2018 në mënyrën më të mirë të mundshme, duke e organizuar Turneun e Fundvitit, në të cilin kanë marr pjesë 14 klube nga pothuajse të gjitha qytetet e Kosovës me vajzat e moshës 12 deri 15 vjeç.
Turneu i Fundvitit është organizuar më 29 dhjetor (të shtunën) në palestrën e sportit të Kolegjit “ISP” në lagjen “Marigona Residence” në Prishtinë.
Në finale të turneut janë takuar vajzat e reja të Kerasan Prishtinës dhe ato të United Basket nga Gjilani, ndërsa kanë triumfuar basketbollistet nga kryeqyteti, derisa rezultati final i këtij turneu ishte krejt në plan të dytë, sepse e rëndësisë së veçantë për Federatën e Basketbollit të Kosovës ishte pjesëmarrja e sa më shumë vajzave në këtë aktivitet dhe inkurajimi i tyre për t’u marr me basketboll.
Në kuadër të Turneut të Fundvitit, Federata e Basketbollit të Kosovës ka ndarë edhe shumë dhurata dhe shpërblime për vajzat dhe klubet pjesëmarrëse.
Me këtë Turne të Fundvitit është lansuar projekti “FIBA Europe Girl's Basketball Program” që financohet nga FIBA Evropa dhe mbështetet nga Ministria për Kulturë, Rini e Sport, si dhe Ambasada Amerikane në Prishtinë.
Kampanja e këtij projekti është "Her World, Her Rules" (Bota e Saj, Rregullat e Saj), ku me këtë rast do të inkurajohen vajzat e reja që të merren me basketboll.
FIBA Evropa është duke punuar në partneritet me Federatat Nacionale nëpër gjithë Evropën për të implementuar këtë kampanjë.
Nëpërmjet këtij projekti FBK synon të zhvilloj basketbollin ndër vajza në vendet rurale të Kosovës, apo edhe në qytetet ku nuk ka aktualisht ekipe të femrave të basketbollit.
Target i FBK-së në këtë projekt do të jenë vajzat e shkollave fillore, prindërit, arsimtarët e Edukatës Fizike, si dhe trajnerët e basketbollit.
Në kuadër të këtij projekti do të organizohen, kampe, turne, punëtori, klinika, në mënyrë që të arrihet edhe qëllimi i projektit, e që është masovizimi i basketbollit ndër vajza, por edhe krijimi i ekipeve të femrave në qytetet/fshatrat ku nuk ka basketboll të femrave, si dhe krejt në fund të arrihet që pas disa viteve edhe në konkurrencën e femrave të kemi liga prej kategorisë U12 e deri tek senioret.