Numri një i Federatës së Basketbollit të Kosovës (FBK), Arben Fetahu e ka përgëzuar skuadrën e Bashkimit të Prizrenit për plasimin në finale të Sigal Uniqa Ligës Ballkanike (BIBL).
Bashkimi të shtunën ka triumfuar ndaj Rilski Sportist në gjysmëfinale të BIBL-it në një finish dramatik me rezultat 72:71 dhe tani në finalen e madhe që do të zhvillohet të dielën në Samokov do të përballet me ekipin bullgar, Levski Lukoil.
Arben Fetahu, kryetar i FBK-së:
“Në emër të Bordit të FBK-së e përgëzoj KB Bashkimin për sigurimin e një vendi në finale të Ligës Ballkanike. Ishte një ndeshje mjaft e vështirë, por që të gjithë ne jemi krenar me të arriturën e skuadrës nga Prizreni.
Po ashtu dua të shfrytëzoj rastin dhe t’i dëshiroj KB Bashkimit suksese në finale dhe le të shpresojmë se nga Bullgaria do të kthehen me titullin e Ligës Ballkanike”.
Duhet theksuar se për ekipin prizrenas ky sukses është historik pas tri vite pjesëmarrje në këtë garë.
Njëherësh KB Bashkimi ka qenë klubi i vetëm nga Kosova që në edicionin 2017/18 ka marr pjesë në Ligën Ballkanike.