Ministri i Kulturës, Rinisë dhe Sporti, Kujtim Gashi, ka pritur në takim basketbollistet e Klubit Prishtina.
Qëllimi i këtij takimi ishte mbështetja e klubeve me nga 10 mijë euro nga ana e Ministrisë pas sukseseve të njëpasnjëshme.
“Sukseset e këtyre klubeve sigurisht që duhet mbështetur edhe financiarisht. Respektivisht klubi basketbollistik Prishtina në kategorinë e femrave gjatë vitit 2019 ka fituar Super Kupën, Kupën e Republikës së Kosovës dhe titullin Kampion”, tha ministri Gashi.
Po ashtu, ministri tha se “nuk është e lehtë për të qenë kampion por e gjithë kjo fal punës dhe angazhimit të tuaj. Ministria e Sportit është e përkushtuar që në vazhdimësi të shpërblej Federata Sportive dhe sportistët për punën dhe angazhimin e tyre, duke pasur parasysh se sportistet tanë po arrijnë suksese në vend dhe jashtë vendit, dhe po e përfaqësojnë Kosovën në mënyrën më të mirë të mundshme”.
Basketbollistet, ministri Gashi i përgëzoi për titujt e fituar dhe i inkurajoi që të vazhdojnë edhe më tutje të punojnë fuqishëm në mënyrë që edhe në të ardhmen të sjellin rezultatet në garat vendore si dhe ato ndërkombëtare.
Ndërkaq, trajneret e ekipeve fituese e falënderuan ministrin Gashi për punën, angazhimin dhe mbështetjen e vazhdueshme që po u jep ekipeve.
Ato thanë se këto shpërblime nga ana e Ministrisë janë shpresë për të punuar dhe për t’u angazhuar edhe më shumë drejt arritjeve të reja.