Përballja ndërmjet Trepçës dhe Golden Eagle Yllit nga Theranda e zhvilluar të dielën në palestrën e sportit “Jeton Tërstena – Tota” në Vushtrri në kuadër të xhiros së XVII-të është ndërprerë pranë rezultatit 73:70 kur kishin mbetur edhe 2:05 minuta pa përfunduar ndeshja.
Takimi është ndërprerë pas sulmit fizik të trajnerit të ekipit therandas, Agron Berisha ndaj gjyqtarit Xhelal Mumini, derisa pas këtij incidenti ka pasur edhe hyrje të publikut në fushë.
Komesari i Garave i FBK-së së shpejti pritet të marr vendime në bazë të propozicioneve të garave në lidhje me këtë incident dhe kjo do të ndodh pas mbledhjeve të fakteve konkrete dhe shikimit të video-xhirimit.
Ndërkaq në kuadër të xhiros së XVII-të fitore kanë regjistruar Peja dhe Sigal Prishtina. Verdhezinjtë e kanë mposhtur Kerasan Prishtinën, derisa bardhekaltrit ishin më të mirë se Vllaznimi i Gjakovës.