Federata e Basketbollit të Kosovës me pikëllim të thellë njofton opinionin për një ngjarje tragjike që ka ndodhur në orët e hershme të mëngjesit të së shtunës.
Në një aksident rrugor që ka ndodhur në Gjakovë, ka humbur jetën reprezentuesi i Kosovës, Gazmend Sinani.
Në po të njëjrin aksident lëndime trupore kanë pësuar edhe Granit e Fisnik Rugova, Altin Morina dhe fizioterapeuti i reprezentacionit Kujtim Shala.
Federata e Basketbollit shpreh ngushëllimet e përzemërta familjes Sinani dhe miqve të Gazmendit për këtë humbje të pakompensueshme.
Gazmend Sinani ishte 27 vjeçar. Pasi kaloi grup moshat e reja ne Prishtinë, karrierën e vazhdoi në Turqi ku ishte pjesë e akademisë së Fenerbahçes dhe kombëtareve turke të grup moshave të reja.
Në Kosovë ka luajtur për Prishtinën dhe Bashkimin, kurse në klube të ndryshme turke është paraqitur disa sezone.
Më 2017/18 luajti në ligën elite në Angli.
Sinani ishte anëtar i kohëpaskohshëm i kombëtares së Kosovës, që nga pranimi i FBK-së në FIBA.
Me humbjen e tij, Kosova ka humbue një prej basketbollistëve më të mirë të gjeneratës, kombëtarja ka humbur njërin prej basketbollistëve më të vlefshëm dhe më luftarak.
Angazhimi i tij gjatë përgatitjeve për ndeshjet e qershorit ka qenë inspirim dhe motiv për bashkëlojtarët, kurse qasja e tij profesionale dhe shpirti luftarak do të mbeten në kujtim të secilit adhurues të basketbollit.