Rahoveci ka debutuar me fitore në elitën e basketbollit kosovar, pasi të shtunën mbrëma në ndeshjen e zhvilluar në palestrën “13 Qershori” në Therandë e ka mposhtur Kerasan Prishtinën me rezultat 74:57 (21:13, 11:22, 20:10, 22:12).
Më efikasit te skuadra fituese ishin Valon Bunjaku me 18 pikë, 10 kërcime e 5 asistime dhe Driton Bajrami me 14 pikë e 8 kërcime, kurse te ekipi prishtinas më të dalluarit ishin Ermir Gashi me 19 pikë e 3 kërcime dhe Genc Gashi me 14 pikë e 4 asistime.
Në kuadër të xhiros së parë të Superligës së Kosovës të dielën do të zhvillohen edhe dy ndeshje të tjera, ku në Prizren luhet kryendeshja në mes Bashkimit dhe Sigal Prishtinës, ndërsa në Therandë, Golden Eagle Ylli e pret Pejën. Të dy këto takime do të zhvillohen me fillim nga ora 18:00. Ndërkaq Trepca të premten e ka mposhtur Vllaznimin, ndeshje kjo që edhe ka hapur edicionin e ri në elitën e basketbollit kosovar.