KB Golden Eagle Ylli do të jetë nikoqir i Turneut Final të IPKO Kupës së Kosovës në Basketboll.
Bordi i FBK-së vlerësoi se kandidatura e KB Golden Eagle Ylli për organizim të Turneut Final e dorëzuar në ditën e fundit të konkursit që FBK kishte shpallur për këtë turne, i plotëson kushtet e kërkuara nga FBK-ja dhe i ka dhënë këtij klubi të drejtën e organizimit të kësaj ngjarjeje.
Fundjavën e ardhshme në Suharekë, katër ekipet më të suksesshme të IPKO Kupës në konkurrencën e meshkujve dhe dy ekipet më të suksesshme në konkurrencnë e femrave do të garojnë për të fituar trofeun më masiv te basketbollit të Kosovës.
Orari i plotë i ndeshjeve gjysmëfinale dhe finales së meshkujve si dhe ndeshjes finale të femrave do të bëhet publik ditëve të ardhshme, pasi të zhvillohen dy ndeshjet e mbetura çerekfinale të meshkujve (Sigal Prishtina – Kacaniku dhe Peja – Kosova).
Fitues të vitit të kaluar të IPKO Kupës janë Sigal Prishtina në konkurrencën e meshkujve dhe Penza në konkurrencën e femrave.